У гэтым посце падзялюся досведам, які набыў падчас выпрабавання - #10wikidays.

Умовы выпрабавання

Асноўны сэнс чэленджа заключаўся у тым, каб дадаваць напрацягу 10 дзён, кожны дзень 1 артыкул, без дзён пауз.

За гэты перыяд я зрабіў два пералёты, якія у сярэднім забралі па 6-8 гадзін кожны, наведаў інтэрнет канфэрэнцыю, камунікаваў з шэрагам людзей, чытаў кнігі, займаўся справамі карацей - гэта былі даволі інтэнсіўныя дні.

Сярэдняя працягласць напісання аднаго артыкула каля 2-х гадзін. Здаралася менш, калісьці больш. Асноўны спосаб напісання - гэта пераклад артыкулаў з англамоўнай вікіпедыі на тэмы, якія мне цікавы. Ніжэй спіс артыкулаў: гік, лічбавы грамадзянін, кіберсэкс, мэнэджмэнт супольнасці, шарынг, сеткавы грамадзянін,  уласнасць супольнасці, лічбавыя правы, мэш сеткі, вялікія дадзеныя. Вядома, што пакуль артыкулы не ідэальныя, іх варта дапрацоўваць. На тое існуе вікіпедыя, адзін пачынае - іншыя падхопліваюць.

Чэленджы

Па-першае, самая глабальная цяжкасць - гэта пачаць. Напачатку падаецца, што гэта вельмі непад’ёмная колькасць артыкулаў і наогул, як гэта выдзеліць напрацягу 10 дзён час для сядзення за кампом і напісання тэкстаў. Гэта рэальна!

Па-другое, гэта адсутнасць звычкі. Часам узгадваў у 21-22 гадзіны вечара, што неабходна напісаць артыкул. Таму планаванне часу можа быць карысным. Вядома калі вы выцісніце сябе напрацягу дня, то сілаў будзе вельмі няшмат для напісання.

Па-трэцяе, насамрэч вызначыць аб’ём артыкула, які будзе прымальны па-памеру, якасці і часу на яго затрачанага. Асабліва напачатку гэта складана зрабіць, бо часта існуе жарсць да ведаў (паходы па шматлікіх спасылках і т.п.), якая можа забіраць вялікія кавалкі і сіл і часу. Такую асаблівасць ведаў трэба мець на ўвазе.

Новы накірунак у вікі

Беларуская вікіпедыя мае вельмі шмат белых плямаў і хутчэй за усё, калі вы цікавіцеся кап’ютарнымі навукамі, сацыялогіяй, паліталогіяй, філасофіяй, правам, эканомікай і шмат якімі іншымі галінамі ведаў, вы будзеце працаваць ў адкрытым полі рыдлёўкай))). Гэта значыць, будзе вельмі шмат чырвоных спасылак і ізаляваных артыкулаў, недахоп новай тэрміналогіі (неалагізмаў), або ваш-свабодны яе пераклад, бо часам вы будзеце першым чалавекам, хто распрацоўвае гэту галіну ведаў па-беларуску, адсутнасць катэгорый і таксама шэраг іншых выклікаў класіфікацыі.

Вядома, што такая нявызначанасць дае свабоду і гнуткасць, якая, напрыклад, у некаторых вялікіх раздзелах каардынальна звужана. Я пісаў пра супольнасці, лічбавыя тэхналогіі, правы - гэта неўзаранае поле, адкрытае для розных дыскурсаў.

Новыя прылады

Нарэшце паспрабаваў убудаваны у вікіпедыю перакладчык. Плагін атрымаўся вельмі зручны, не толькі для перакладу тэкста, але подпісаў да малюнкаў, аўтаматычнаму пераносу крыніцаў і спасылак на артыкулы, якія ўжо маюцца ў беларускай Вікіпедыі. З-за недахопаў, часам непрадказальныя паводзіны перапублікацыі, і перанос “бітых” крыніцаў. У любым разе - гэты спосаб паказаў большую эфектыўнасць як па часе, так і па зручнасці, чым выкарыстанне іншых сістэмаў перакладаў.

Што можа быць у будучым?

Па-першае, гэты фармат можна працягнуць, некалькі разоў, тым болей у розных моўных раздзелах і зрабіць інтэрнацыянальным, як гэта робіць міжнародная ініцыятыва для вікінінзя - 100wikidays.

Па-другое, можна прапанаваць не вікіпедыстам або зусім новым рэдактарам далучацца, бо дзесяць інтэнсіўных вікі дзён могуць істотна палепшыць валоданне навыкамі пісьма і валодання вікітэхналогіямі.

І, па-трэцяе, гэты нашмат больш лёгкі фармат можа быць добрай нагодай для больш маштабнага мерапрыемства - конкурса для пачынаючых рэдактараў. Я адкрыты да супрацы з іншымі, бо можа атрымацца актыўная двіжуха.

Дарэчы, як і абяцаў, першым 10 паспяхова прайшоўшым гэта выправабанне, уручу самаробныя прызы. На сёння ўжо далучылася некалькі вікіпедыстаў і адзін з іх прайшоў гэту дыстанцыю. Астатнія прызы чакаюць сваіх пераможцаў =)